1 أكتوبر، 2012

لقائي في برنامج ثقافية كافية على قناة النيل الثقافية

ده أول لقاء تلفزيوني ليا ويومها كنت فرحان أوي ومش مصدق.. قبلها بيوم كلمني الأستاذ الجميلي أحمد صاحب دار النشر اللي نشرتلي الكتاب وقاللي روح إستديو قناة النيل الثقافية علشان يسجلو معاك.. ميعاد البرنامج واحدة ونص .. طبعاً كانت مفاجأة جميلة وماكنتش فاهم إيه بيحصل وإمتى وإزاي.. بعد كدة عرفت إنهم في البرنامج ده في معرض الكتاب بيهتمو بالشباب أصحاب العمل الأول.. وفعلا روحت يومها بدري وأعدت مع معدة البرنامج.. وشوية ولقيتها جت بتقولي معلش إحنا هنأجل اللقاء للساعة خامسة.. الغريب ماضايقتش لأني من جوايا كنت عارف إن فيه حاجة هتحصل والموضوع مش هيتم.. ههههههههه.. فقلتلها طيب لو هتلغي خالص مفيش مشكلة والموضوع مفيهوش إحراج ولا حاجة وأنا مش مضايق بجد.. بس عرفيني علشان ماستناش على الفاضي.. لو كدة أروح أحسن.. الحقيقة هي كانت إنسانة ذوق قوي.. قعدت تعتذر وتقولي والله غصب عننا.. حصلت لخبطة في المواعيد علشان إحنا هوا ودي حاجة بتحصل دايما بس على فكرة كدة أحسن.. أنا ممكن أخليك تطلع في ميعادك بس البرنامج هيقعد 10 دقايق.. لكن لو استنيت هنعمل حلقة كاملة طويلة نص ساعة.. قلتلها تمام.. وقعدت ألف في المعرض شوية لحد الساعة 5.. وروحت للمعدة اللي قالتلي يللا استعد هتدخل دلوقتي.. ساعتها بقى اتصلت بيهم في البيت وقلتلهم افتحو قناة النيل الثقافية هطلع فيها دلوقتي واتصلت بصحابي قلتلهم.. المذيع وهو برضه ذوق قوي قعد يتكلم معايا شوية قبل ما نطلع أنا وعمرو حسين صاحب رواية الرهان وهي أول عمل ليه برضه.. طبعا كان فيه توتر وإنفعال وحاولت اهدِّي نفسي على أد ما أقدر.. وآهو الحمد لله ربنا وفقني وعرفت أقول كلمتين.

الحلقة بتاريخ: الخميس 2 / 2 / 2012

هناك 16 تعليقًا:

ريـــمـــاس يقول...

صباح الغاردينيا ضياء
أول صباحاتي كانت هنا
واللقاء جميل جداً
في البداية كان باين عليك الارتباك خاصة لما تكلمت عن اخوك الكبير ههههههه بس بعدها اتغيرت وكان لقاء رائع
ربنا يوفقك يارب :) "
؛؛
؛
لروحك عبق الغاردينيا
كانت هنا
Reemaas

مروة زهران يقول...


صباح النور
مكنتش مرتبك أوى
لقاء جميل جدا
ماشاء الله عليك
ويارب دايما من نجاح عظيم لنجاح أعظم
وعقبال الكتب الجاية ان شاء الله

Deyaa Ezzat يقول...

ريماس
صباح التوليب

طبعا محظوظ إن أول شروق لقلمك كان في ميدونتي المتواضعة

طب كويس إنه عجبك.. أصله مش عاجبني خاااااااااالص.. ومش ببصلي وهو شغال
هههههههههههههههه

أخويا ده أصله حكاية *_*

ربنا يكرمك ويسعدك

ويارب دايما يكون ليا نصيب في صباحاتك

ألف شكر

Deyaa Ezzat يقول...

مروة زهران

صباح الفل والورد

ممممممممم.. طيب تمام.. ماشي.. هصدق D:

ربنا يخليكي يا ميرو

ويارب انتي كمان دايما في نجاح وتوفيق

ألف شكر

أحمد أحمد صالح يقول...

اللقاء جميل جدا جدا ياضياء،وما فيش إرتباك ولا حاجة،في ناس بتبقى أول مرة دي مش قادرة تنطق خالص!
يمكن الإرتباك الجزئي عندك كان في صوغ الفكرة اللي انت قاصدها الي حد ما في بعض الجزئيات،بس مش في الكلام بشكل عام،وده ممكن يحصل مع أي حد حتى لو مش في لقاء تلفزيوني،وأكيد المرات الجاية هتبقى أفضل من كدة بكتير..
لقاء رائع يا صديقي،وإن شاء الله مزيد من اللقاءات والإصدارات،ومزيد من النجاح والتألق،كل الود يا صديقي.

أحمد أحمد صالح يقول...

نسيت أقول..إلقاءك جميل جدا..وتوضيحك لنوع كتابتك جميل..وانت تغيرت من اول البرنامج لأخره!

كريمة سندي يقول...

لقاء جميل ومفيد جدا .. سعدت من كل قلبي بهذه المبادرة الإيجابية التي قمت بها .. بارك الله فيك

Amira Ahmed يقول...

مبروك ضياء كان لقاء جميل
كنت الأول مرتبك شوية وبعدين الارتباك تلاشى تماما لاخر البرنامج
من نجاح لنجاح يارب:))))

Samah Ibrahim يقول...

كنت قمة فى التألق كعادتك دايما يا ضياااا و فعلا كلية أداب اسكندرية ليها الشرف انك درست فيها
الف مبروووووووك ومن تألق الى تألق و من تقدم الى تقدم ان شاء الله
ربنا يوفقك

وصف الاحساس يقول...

حصل امتي الكلام ده
وكتاب ايه ده
عموما الف مبرووووك
اكيد كنت منور الشاشه
بالتوفيق ان شاء الله
تحياتي

محمد جمال يقول...

جامد جدى
ايه ياعم الشغل الجامد طحن ده
وتقولى مرتبك
بجد دايما متألق

Deyaa Ezzat يقول...


أحمد أحمد صالح

ربنا يخليك يا احمد.. ألف شكر بجد

كريمة سندي
وبارك الله فيكي يا أستاذة
نورتيني والله

Deyaa Ezzat يقول...


Amira Ahmed

ربنا يبارك فيكي يا أميرة
طيب تمام

بالتوفيق ليكي دايما انتي كمان يارب

نورتيني أكيد

Deyaa Ezzat يقول...


Samah Ibrahim

:$ :$ :$
إيه بس الكلام الجميل دة يا سماح
وأكيد أنا اللي ليا الشرف والفخر بإني خريج آداب إسكندرية
وكنت محظوظ بجد بالعلماء اللي درسولي فيها

ده غير إني بموت في إسكندرية

ربنا يخليكي يارب ويسعد قلبك دايما

Deyaa Ezzat يقول...


وصف الإحساس
حصل يا ستي في معض الكتاب بتاع السنادي
زده كتابي .. باغير آخر حاجة
*_*
نورك أكيد أجمل وحضورك أزهى

ربنا يكرمك وألف شكر

Deyaa Ezzat يقول...


محمد جمال
ألف شكر يا صديقي الجميل
دايما منورني والله

Translate