23 أكتوبر، 2012

شك!

ما بين واحد اندفعلُه علشان يتكلم..،
وواحد اندفع في كلامه..
مابقيتش باصدق حد!

https://twitter.com/DeyaaEzzat/status/188665537209974785

بتايخ: 7/4/2012   

لحظة!

فيه لحظة عبقرية بتنور جوّة العقل فجأة بفكرة أو بحل لمشكلة.. اللحظة دي لو ماتمسكتش في وقتها بتضيع للأبد.

https://twitter.com/DeyaaEzzat/status/184823155192377344

بتاريخ: 28/3/2012     

سواد!

_عارفة سواد العسل؟
_عارفة السواد بس! :(

https://twitter.com/DeyaaEzzat/status/164887070001729537
بتاريخ: 12/2/2012  

1 أكتوبر، 2012

لقائي في برنامج ثقافية كافية على قناة النيل الثقافية

ده أول لقاء تلفزيوني ليا ويومها كنت فرحان أوي ومش مصدق.. قبلها بيوم كلمني الأستاذ الجميلي أحمد صاحب دار النشر اللي نشرتلي الكتاب وقاللي روح إستديو قناة النيل الثقافية علشان يسجلو معاك.. ميعاد البرنامج واحدة ونص .. طبعاً كانت مفاجأة جميلة وماكنتش فاهم إيه بيحصل وإمتى وإزاي.. بعد كدة عرفت إنهم في البرنامج ده في معرض الكتاب بيهتمو بالشباب أصحاب العمل الأول.. وفعلا روحت يومها بدري وأعدت مع معدة البرنامج.. وشوية ولقيتها جت بتقولي معلش إحنا هنأجل اللقاء للساعة خامسة.. الغريب ماضايقتش لأني من جوايا كنت عارف إن فيه حاجة هتحصل والموضوع مش هيتم.. ههههههههه.. فقلتلها طيب لو هتلغي خالص مفيش مشكلة والموضوع مفيهوش إحراج ولا حاجة وأنا مش مضايق بجد.. بس عرفيني علشان ماستناش على الفاضي.. لو كدة أروح أحسن.. الحقيقة هي كانت إنسانة ذوق قوي.. قعدت تعتذر وتقولي والله غصب عننا.. حصلت لخبطة في المواعيد علشان إحنا هوا ودي حاجة بتحصل دايما بس على فكرة كدة أحسن.. أنا ممكن أخليك تطلع في ميعادك بس البرنامج هيقعد 10 دقايق.. لكن لو استنيت هنعمل حلقة كاملة طويلة نص ساعة.. قلتلها تمام.. وقعدت ألف في المعرض شوية لحد الساعة 5.. وروحت للمعدة اللي قالتلي يللا استعد هتدخل دلوقتي.. ساعتها بقى اتصلت بيهم في البيت وقلتلهم افتحو قناة النيل الثقافية هطلع فيها دلوقتي واتصلت بصحابي قلتلهم.. المذيع وهو برضه ذوق قوي قعد يتكلم معايا شوية قبل ما نطلع أنا وعمرو حسين صاحب رواية الرهان وهي أول عمل ليه برضه.. طبعا كان فيه توتر وإنفعال وحاولت اهدِّي نفسي على أد ما أقدر.. وآهو الحمد لله ربنا وفقني وعرفت أقول كلمتين.

الحلقة بتاريخ: الخميس 2 / 2 / 2012

29 سبتمبر، 2012

جواد!

لكلِّ جوادٍ كبوة..
كبوتان.. تجعلاه يتعلم.
ثلاث.. تجعله أقوى ربما.
أربع.. تكسره حتماً !
خمس.. بكل تأكيد لأنه غبي!

https://twitter.com/DeyaaEzzat/status/129412801478397953
بتاريخ: 27 / 1 / 2011   

سؤال!

مع كل الإحباط اللي كاتم على مرواحنا ومحاصرنا..،
مابقيتش عارف..
هو إحنا جامدين قوي كدة؟!..،
وللا بقينا باردين ومابنحسش قوي كدة؟!
https://twitter.com/DeyaaEzzat/status/125314446213124096
بتاريخ: 15 / 10 / 2011   

حقيقة!

من اليوم لا توجد حقيقة!..
أنا الحقيقة!
وأيّ شيءٍ بعدي مشكوكٌ فيه لحين إثبات العكس! 

https://twitter.com/DeyaaEzzat/status/124999032824266753
 بتاريخ: 

الإنسحاب!

الإنسحاب من قضية أو مناقشة (جماعية) لا يعني شيئاً سوى إنك تعطي فرصة لآخر كي يأخذ مكانك لإثبات وجهة نظره والتأكيد عليها أمامهم! 
https://twitter.com/DeyaaEzzat/status/120817910590603264
بتاريخ:  3/ 10 / 2011 

تفاصيل!

أُحبُ التقاط التفاصيل الصغيرة لأحيك منها عباءةً تفتح لي أبوابا مغلقة.
https://twitter.com/DeyaaEzzat/status/115015401619984384
 بتاريخ:  17 / 9 / 2011  

25 سبتمبر، 2012

Review: لحظات تأمل


لحظات تأمل
لحظات تأمل by مروة زهران

My rating: 3 of 5 stars



نستطيع أن نُصنِّف الكتاب على إنه مجموعة من الخواطر الناتجة عن تأملات مروة لمواقف ربما صادفت بعضها في حياتها وربما صادفتها في تجارب الآخرين.

وفي العموم سيجد كل من يقرأ هذا الكتاب نفسه في موقف من تلك المواقف..،
فمن منا لم يفرح أو يحزن أو يحب أو يفارق أو يشعر بالإغتراب!

كما نستطيع بثقة تصنيف الكتاب على إنه من الأدب الأنثوي أو النسائي.. فبرغم تشابه المواقف ومرور الرجل والمرأة بنفس الموقف تبقى تأملات مروة من منظور "بنوتة".. ويعبر عن رؤيتها الخاصة.

أسلوب مروة جميل في الكتاب.. واضح اعتمادها على اقتباسات لكبار الكتاب وهو شيء يُحسب لمروة لأنها استخدمت الاقتباسات بشكل دقيق ويخدم الموضوع.. كما أنه يدل على سعة إطلاع مروة وثقافتها.



الكتاب عجبني في مجمله.. جميل ومكتوب بصدق هيحس بيه القاريء.





View all my reviews

20 سبتمبر، 2012

حدوتة العشق والأرض.. (شفيقة وأبو زيد)!

مبدأيا عايز أقول إن القصيدة دي من أجمل قصائد عامية قرأتها في حياتي (إن لم تكن الأجمل على الإطلاق).. القصيدة رائعة أبدعها الشاعر أحمد سعد Ahmed Saad

الأولة وصلِك
والتانية ترحالِك
والتالتة أصلِك
عجبك خلاص حالِك
والرابعة إنسي
والخامسة أنسالِك
والسادسة إقسي
واستكتري سؤالِك
والسابعة المكتوب
مضروب على رمالِك
تعودي يا قمح القلوب
لجدورك وسلسالِك
**********
الأولة وصلِك
قدري ومكتوبِك
كسرتي ليه وزنِك؟
شقيتي ليه توبِك؟
إكمني مجذوبِك!
بتحدفيني طوب
لو بدك التوبة
بزيادة مش راح أتوب
أنا اللي دبت دوب
يادوب بموت فيكي
لو قد عمري قلوب
مش راح أكفيكي
مربوط في خطاويكي
يا أم الخطا دوار
عايزاني أفرَّط فيكي
وارضى لروحي العار؟
طب كيف يا قدري أعيش
لو موتِّي جوايا
حُكم الهوى غلاب
على الكل إلايا
ياللي انتي نساية
أنا لسه مش نساي
كان ليا فيكي الماضي
وبكرة ليا الجاي
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والتانية ترحالِك
في ركاب قليل الأصل
وصلتي دياب الطبع
والديب ما يعرف وصل
لا دمه من دمك يا شفيقة
ولا طينته من أرضك
ولا عمره صام خماسينك
ولا ركع فرضك
ولا نفخ عينك
لما طرفها الزمن
بالبخس باع عرضك
والعرض مر التمن
ومن غريب لغريب
عسلك بيتصفى
ولا عاد حرام ولا عيب
ولا وزن للكفة
وأم الخلول تتشفى
وتعصر لباس العفة
ومع كل حاكم جديد
نعيد تاني اللفة
مين اللي كسر الدفة
وخلى مركبك عوجة
مع كل هبة ريح
تمشي في ريح الموجة
وتجوعي يا حرة
وتاكلي بنهودِك
وتسافري بلاد برة
تتأصعي بعودِك
وتدوسي على خدودِك
بكعبك العالي
وتوطِّي بسجودِك
لكل باب عالي
والجوف يبات خالي
والمر ما يحلاش
بعتي اللبن بالعفن
باعك العفن ببلاش
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والتالتة أصلِك
عجبك خلاص حالِك
رضيتي بالتغريب
وتوب الغريب هالِك
والزرعة لما تخيب
ما يبكيها غير مالِك
والدمعة لما تسيب
ما يمسحها غير شالِك
وانتي يا جوزة الطيب
يا مطاوعة عزالِك
داويتي علة وشيب
وتعبتي حمالِك
لكن مسير الغيب
يردك لمنوالِك
يطير الحمام ويغيب
ويعاود تاني لغيتة
وأبو زيد وياللعجب
بيلف مع ساقيته
ورغم الجفاف والجدب
مبديكي على سقيته
لسَّاه بيسقي جدورِك
يا بعيدة ومش شايفاه
وليلاتي يسافر يزورِك
في خياله يا ولداه
مين ده اللي يرضى بشقاه؟
إلا لو عاشق
والواد صُبحه مساه
وسهم الهوى راشق
وانتي يا متغربة
وسارحة في ملكوتِك
غرِّك رحيق الصبا
لما استوى توتِك
بكرة تدور الرحايا
ويطحنك الطريق
والوردة يدبل ربيعها
ويتصفى الرحيق
ومين هيصلب طولِك
لما يبان أتبِك؟
هو اللي زارع فطورِك
وصاين حدود عتبِك
هو اللي كتبك بدمه
قدر على جبينه
والعار جدار فاصل
واصل بينك وبينه
لكنه مش همه
لا خاله ولا عمه
وإن كان وصلك مذلة
يمسح عارها بكمه
وإن كان عشقك حَنَش
لأجلك يسكَر بسمه
وإن كان في حضنك موته
يموت.. مادام هيضمه
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والرابعة إنسي
طيرِك وأرضِك وناسِك
واتهني بنقوطِك
واستغني عن فاسِك
واتمايلي على قوتِك
واسترزقي بكاسِك
واترقصي بنبوتِك
واتحامي في ديّاثِك
ياللي انتي كان عودِك
زي الجبل ماسِك
لو تقـِّلوكي بالدهب
زمان ما يسوى مداسِك
دلوقت صار صوتِك
كومة رماد طافي
إيه لازمة القوافي؟
والكلمة مش من راسِك!
إنسي قطننا ولَطْعُه
وحطبه ومواكبه
واللعب عند الساقية
والقمح ومراكبه
إنسي ديارنا
وحضنها لبعضها من البرد
إنسي قمرنا
وإنسي الربابة والسرد
إنسي العزيق والحرت
والطرف في السيالة
إنسي الدرَّاس والسمس
والرُمح في القيالة
وانسي البنات الحجالة
على عتبة المضيفة
وانسي عرق النهار
وانسي ليالي الصفا
والحكمة وضرب المثل
من بطن بلاليص العسل
يا مرحرحة في الكسل
يا سَبِّـيّة العولمة
إيه ده اللي ليكي حصل؟
مش طبعك الخو(جـ)ـنة!
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والخامسة أنسالِك
تكسير مجاديفي
واعيش مع مرسالِك
أسطورة من تخاريفي
ونتواعد
ونتعاتب
وكأني مش في خريفي
وضلي يحضن ضلِك
وطيفك يبوس طيفي
وتسكن جوايا دارنا
وافرشها ولاد وبنات
وأكيد بيكي قدرنا
واغنيلك تلات غنوات
غنوة لبعادِك
يا أم الهوى غلاب
وغنوة لميعادِك
يا ام الفؤاد قلاب
وغنوة للحلم
بلاش تصادريها
خليني شبطان فيها
هي الأحلام بحساب؟!
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والسادسة إقسي
قسا الحبيب مبلوع
وجرح الحبيب أخرص
حتى لو مسموع
وأنا أصلي راجل فلاح
وليا في المحبة جسور
وعمري ما أكره أرضي
وان كانت بايرة بور
ومفيش في الكون بطون
تكره حِبَالة الولد
تتحرت الأرض مرضية
بس الجنين يتولد
وانتي الجنين والبطن
والأرض والميلاد
وأنا المصلوب ورا ضهرك
يا أم الرحم ولّاد
يا شفيقة على الكل
وعليا زي الصخر
صدري اتنحل من الجفا
والشوق نخرني نخر
أنا اللي بكل فخر
شايل لفيروسِك
أنا دموع نيلِك
لما اتبلى بهكسوسِك
أنا قمحِك اللي اتعطب
في سنين الجدب من سوسِك
أنا حصنك اللي اتنصب
أول ما دق ناقوسِك
أنا سن اتكسر في تروسِك
أنا حكم اتنسخ من دينِك
أنا سمهم اترمى من قوسِك
واتنسى في ميادينِك
أنا حفنة من ريحة ترابِك
لسه فيها الروح
تفكرك بشبابِك
وبأجمل ما فيكي تفوح
أنا عمرِك المدبوح
يا شاربة ترياقي
ييجي الغريب ويروح
وأفضل أنا باقي
بدمي،
بروحي،
بريحة الطمي على جسمي
تحرقيني!
تدهسيني!
توأديني تحت التراب
هيعيش فوق التراب إسمي
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والسابعة المكتوب
مضروب
على رمالِك
تعودي يا قمح القلوب
لجدورك وسلسالِك
وتعود يا طمي النيل
تخصب ضهر وادينا
وتعود يا قطن النيل
وتميل على إيدينا
وتعودي يا جنينة
تملي الديار فرحة
ونعلق الزينة
وتلبسي الطرحة
وتعودي يا شمس الريف
وتطلي من الشباك
عارفِك مهما تغيبي
ضي الهوى شبَّاك
سماح النوبة دي
وكل نوبة
وإيه في إيدي غير السماح
تحرم عليا التوبة
يا ام الحنين دباح
هاروح منك لفين
ومني لفين هاتروحي؟!
تتراوح بعيد خطاوينا
وتروح روحك في روحي
وتروحي يا تغريبة
ويروح الوبا والسُخرة
ماناقصش غير القرود
تتسيّد علينا رخرة
هكسوس وترك عجم
الكل غنى علينا
والكل انجلى برطمه
وفضلت غناوينا
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي

Translate