20 سبتمبر، 2012

حدوتة العشق والأرض.. (شفيقة وأبو زيد)!

مبدأيا عايز أقول إن القصيدة دي من أجمل قصائد عامية قرأتها في حياتي (إن لم تكن الأجمل على الإطلاق).. القصيدة رائعة أبدعها الشاعر أحمد سعد Ahmed Saad

الأولة وصلِك
والتانية ترحالِك
والتالتة أصلِك
عجبك خلاص حالِك
والرابعة إنسي
والخامسة أنسالِك
والسادسة إقسي
واستكتري سؤالِك
والسابعة المكتوب
مضروب على رمالِك
تعودي يا قمح القلوب
لجدورك وسلسالِك
**********
الأولة وصلِك
قدري ومكتوبِك
كسرتي ليه وزنِك؟
شقيتي ليه توبِك؟
إكمني مجذوبِك!
بتحدفيني طوب
لو بدك التوبة
بزيادة مش راح أتوب
أنا اللي دبت دوب
يادوب بموت فيكي
لو قد عمري قلوب
مش راح أكفيكي
مربوط في خطاويكي
يا أم الخطا دوار
عايزاني أفرَّط فيكي
وارضى لروحي العار؟
طب كيف يا قدري أعيش
لو موتِّي جوايا
حُكم الهوى غلاب
على الكل إلايا
ياللي انتي نساية
أنا لسه مش نساي
كان ليا فيكي الماضي
وبكرة ليا الجاي
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والتانية ترحالِك
في ركاب قليل الأصل
وصلتي دياب الطبع
والديب ما يعرف وصل
لا دمه من دمك يا شفيقة
ولا طينته من أرضك
ولا عمره صام خماسينك
ولا ركع فرضك
ولا نفخ عينك
لما طرفها الزمن
بالبخس باع عرضك
والعرض مر التمن
ومن غريب لغريب
عسلك بيتصفى
ولا عاد حرام ولا عيب
ولا وزن للكفة
وأم الخلول تتشفى
وتعصر لباس العفة
ومع كل حاكم جديد
نعيد تاني اللفة
مين اللي كسر الدفة
وخلى مركبك عوجة
مع كل هبة ريح
تمشي في ريح الموجة
وتجوعي يا حرة
وتاكلي بنهودِك
وتسافري بلاد برة
تتأصعي بعودِك
وتدوسي على خدودِك
بكعبك العالي
وتوطِّي بسجودِك
لكل باب عالي
والجوف يبات خالي
والمر ما يحلاش
بعتي اللبن بالعفن
باعك العفن ببلاش
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والتالتة أصلِك
عجبك خلاص حالِك
رضيتي بالتغريب
وتوب الغريب هالِك
والزرعة لما تخيب
ما يبكيها غير مالِك
والدمعة لما تسيب
ما يمسحها غير شالِك
وانتي يا جوزة الطيب
يا مطاوعة عزالِك
داويتي علة وشيب
وتعبتي حمالِك
لكن مسير الغيب
يردك لمنوالِك
يطير الحمام ويغيب
ويعاود تاني لغيتة
وأبو زيد وياللعجب
بيلف مع ساقيته
ورغم الجفاف والجدب
مبديكي على سقيته
لسَّاه بيسقي جدورِك
يا بعيدة ومش شايفاه
وليلاتي يسافر يزورِك
في خياله يا ولداه
مين ده اللي يرضى بشقاه؟
إلا لو عاشق
والواد صُبحه مساه
وسهم الهوى راشق
وانتي يا متغربة
وسارحة في ملكوتِك
غرِّك رحيق الصبا
لما استوى توتِك
بكرة تدور الرحايا
ويطحنك الطريق
والوردة يدبل ربيعها
ويتصفى الرحيق
ومين هيصلب طولِك
لما يبان أتبِك؟
هو اللي زارع فطورِك
وصاين حدود عتبِك
هو اللي كتبك بدمه
قدر على جبينه
والعار جدار فاصل
واصل بينك وبينه
لكنه مش همه
لا خاله ولا عمه
وإن كان وصلك مذلة
يمسح عارها بكمه
وإن كان عشقك حَنَش
لأجلك يسكَر بسمه
وإن كان في حضنك موته
يموت.. مادام هيضمه
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والرابعة إنسي
طيرِك وأرضِك وناسِك
واتهني بنقوطِك
واستغني عن فاسِك
واتمايلي على قوتِك
واسترزقي بكاسِك
واترقصي بنبوتِك
واتحامي في ديّاثِك
ياللي انتي كان عودِك
زي الجبل ماسِك
لو تقـِّلوكي بالدهب
زمان ما يسوى مداسِك
دلوقت صار صوتِك
كومة رماد طافي
إيه لازمة القوافي؟
والكلمة مش من راسِك!
إنسي قطننا ولَطْعُه
وحطبه ومواكبه
واللعب عند الساقية
والقمح ومراكبه
إنسي ديارنا
وحضنها لبعضها من البرد
إنسي قمرنا
وإنسي الربابة والسرد
إنسي العزيق والحرت
والطرف في السيالة
إنسي الدرَّاس والسمس
والرُمح في القيالة
وانسي البنات الحجالة
على عتبة المضيفة
وانسي عرق النهار
وانسي ليالي الصفا
والحكمة وضرب المثل
من بطن بلاليص العسل
يا مرحرحة في الكسل
يا سَبِّـيّة العولمة
إيه ده اللي ليكي حصل؟
مش طبعك الخو(جـ)ـنة!
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والخامسة أنسالِك
تكسير مجاديفي
واعيش مع مرسالِك
أسطورة من تخاريفي
ونتواعد
ونتعاتب
وكأني مش في خريفي
وضلي يحضن ضلِك
وطيفك يبوس طيفي
وتسكن جوايا دارنا
وافرشها ولاد وبنات
وأكيد بيكي قدرنا
واغنيلك تلات غنوات
غنوة لبعادِك
يا أم الهوى غلاب
وغنوة لميعادِك
يا ام الفؤاد قلاب
وغنوة للحلم
بلاش تصادريها
خليني شبطان فيها
هي الأحلام بحساب؟!
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والسادسة إقسي
قسا الحبيب مبلوع
وجرح الحبيب أخرص
حتى لو مسموع
وأنا أصلي راجل فلاح
وليا في المحبة جسور
وعمري ما أكره أرضي
وان كانت بايرة بور
ومفيش في الكون بطون
تكره حِبَالة الولد
تتحرت الأرض مرضية
بس الجنين يتولد
وانتي الجنين والبطن
والأرض والميلاد
وأنا المصلوب ورا ضهرك
يا أم الرحم ولّاد
يا شفيقة على الكل
وعليا زي الصخر
صدري اتنحل من الجفا
والشوق نخرني نخر
أنا اللي بكل فخر
شايل لفيروسِك
أنا دموع نيلِك
لما اتبلى بهكسوسِك
أنا قمحِك اللي اتعطب
في سنين الجدب من سوسِك
أنا حصنك اللي اتنصب
أول ما دق ناقوسِك
أنا سن اتكسر في تروسِك
أنا حكم اتنسخ من دينِك
أنا سمهم اترمى من قوسِك
واتنسى في ميادينِك
أنا حفنة من ريحة ترابِك
لسه فيها الروح
تفكرك بشبابِك
وبأجمل ما فيكي تفوح
أنا عمرِك المدبوح
يا شاربة ترياقي
ييجي الغريب ويروح
وأفضل أنا باقي
بدمي،
بروحي،
بريحة الطمي على جسمي
تحرقيني!
تدهسيني!
توأديني تحت التراب
هيعيش فوق التراب إسمي
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي
**********
والسابعة المكتوب
مضروب
على رمالِك
تعودي يا قمح القلوب
لجدورك وسلسالِك
وتعود يا طمي النيل
تخصب ضهر وادينا
وتعود يا قطن النيل
وتميل على إيدينا
وتعودي يا جنينة
تملي الديار فرحة
ونعلق الزينة
وتلبسي الطرحة
وتعودي يا شمس الريف
وتطلي من الشباك
عارفِك مهما تغيبي
ضي الهوى شبَّاك
سماح النوبة دي
وكل نوبة
وإيه في إيدي غير السماح
تحرم عليا التوبة
يا ام الحنين دباح
هاروح منك لفين
ومني لفين هاتروحي؟!
تتراوح بعيد خطاوينا
وتروح روحك في روحي
وتروحي يا تغريبة
ويروح الوبا والسُخرة
ماناقصش غير القرود
تتسيّد علينا رخرة
هكسوس وترك عجم
الكل غنى علينا
والكل انجلى برطمه
وفضلت غناوينا
**********
عاشق وتوتة وناي
وحدوتة مالها زي
وعمر ناقص سكر
وموتة ناقصة شاي

هناك تعليقان (2):

Samah Ibrahim يقول...

جميلة جدا يا ضيا و أجمل مقطع فيها
أنا اللي بكل فخر
شايل لفيروسِك
أنا دموع نيلِك
لما اتبلى بهكسوسِك
أنا قمحِك اللي اتعطب
في سنين الجدب من سوسِك
أنا حصنك اللي اتنصب
أول ما دق ناقوسِك
أنا سن اتكسر في تروسِك
أنا حكم اتنسخ من دينِك
أنا سمهم اترمى من قوسِك
واتنسى في ميادينِك
أنا حفنة من ريحة ترابِك
لسه فيها الروح
تفكرك بشبابِك
وبأجمل ما فيكي تفوح
أنا عمرِك المدبوح
يا شاربة ترياقي
ييجي الغريب ويروح
وأفضل أنا باقي
بدمي،
بروحي،
بريحة الطمي على جسمي
تحرقيني!
تدهسيني!
توأديني تحت التراب
هيعيش فوق التراب إسمي


من اول ما قراتها و انا حاسة انه بيكلم حبيبتى مصر

بجد تسلم ايدك ومن توفيق لتوفيق اكبر ان شاء الله

Deyaa Ezzat يقول...

Samah Ibrahim
فعلا يا سماح الجزأ ده تحفة

ذوق وتذوقك للشعر وللأدب عموما عالي وجميل
يسلمووووووو

ألف شكر

تواجدك هنا مهم

Translate