14 أبريل 2012

الحب والعقل

حوارات (شات) مع أصدقائي وصديقاتي عن مواضيع مختلفة تتعلق بالحب
الحلقة الأولى.. (الحب والعقل)
 أجريت هذا الحوار مع الصديقة (سمية) من الجزائر منذ عدة أعوام.. والتي لا أعرف شيئاً عنها الآن D: واتمنى أن تكون بخير
*******
ضياء: فيه ناس مش بتصدق إننا نحب بعقل.. انتي إيه رأيك؟
سمية: أنا بشوف إن العقل هو اللي بيحب مش القلب أساساً عشان أنا شخصياً مش هقدر ادَّخل حد لقلبي غير لما يدخل عقلي.

ضياء: يا سمسم انتي بتعارضي كل الأفكار في الحب كدة.
سمية: لأ مش بعارضها فيه حب.. بس الأول بشوف إن العقل يتقبل الشخص ده وبعد كدة ييجي القلب.

ضياء: فيه حب.. يعني حصل بالقلب الأول.
سمية: الناس بتشوف القلب هو المسؤول عن مشاعر الحب.. بس أنا بشوف إن عشان القلب يتحرك ويدق لازم العقل يحركو ويسمحلو بده.

ضياء: والقدر؟.. بلاش القلب.
سمية: طبعا يا ضيا كل حاجه بالقدر وقضاء ربنا.
ضياء: قابلتي حد كل ما فيه بيشدك.. تفتكري تقدري تقولي ستوب لاء مش هاحب؟!
سمية: آه.. قابلت.. وعشان ظروفنا متسمحش ولو حبيته أكون جنيت على نفسي.. قدرت محبوش.. وافضل بس معجبه بيه.. ليه لأ يا ضيا.. العقل بيكون في مصلحتنا مش ضدنا هو بيخلينا نفكر.

ضياء: بس ده أكيد بيسبب ألم؟
سمية: آه.. ألم.. بس الواحد ميخدعش نفسه بحب واهم ملوش نهاية.. هيتألم.. هيتألم في الآخر لو حب.. يعني يتألم في البدايه أحسن.

ضياء: طيب وهو تفتكري إن العقل صح دايماً؟
سمية: مش دايماً أكيد.. بس في الحب العقل أضعف حاجه ودايماً يحاول يدي للقلب روحه من غير ما يعذبه ويحاول يشوف مصلحته يعني بلااش نظلم العقل عشان هو أكيد عايز القلب مايتسرعش.

ضياء: يعني العقل ممكن أوي يكون غلط.. منين نعرف الصح؟.. مش عايزة تختاري بقلبك.. وعقلك ممكن أوي يغلط.. هنا نحكِّـم إيه؟
سمية: الظروف يا ضيا هي اللي تحكم.. المفروض العقل بيدرس الظروف والقلب بيدرس الشخص.

ضياء: بيدرس و للا بيحس؟
سمية: سوري.. بيحس.. وعلى كده بقى العقل لو لقا الظروف مش مشجعه هيمنع.. بلاش نحكم ع العقل بانو بارد.

ضياء: إيه اللي يمنع بروده طالما القلب والمشاعر فايرة دايماً مش يمكن كدة يبقى تكامل؟
سمية: وصلت للي عايزة أقوله يا ضياء في الحب.. بشوف إن لازم يكون تكامل بين القلب والعقل عشان نكمل صح.. لو فيه خلل بين الاتنين هنلاقي صعوبات.

ضياء: رأيك معقول أوي يا سمسم.
سمية: أما لو ابتدينا من الأول بإن العقل والقلب موافقين هنعيش أحلى قصة حب.

ضياء: يعني مش القلب ولا العقل.. الاتنين سوا.. تمام كدة فهمنا إنك ضد موافقة القلب لواحده ولازم العقل يكون موافق بنسبة أكبر.. طيب لو العقل هوه اللي وافق والقلب لاء؟.. أكمل؟
سمية: في العاده مش بيحصل كده القلب دايماً متهور والعقل راكز يعني في العاده القلب موافق والعقل لأ ودي المشكلة.

ضياء : لاء بيحصل أقولك إزاي حد بيحبك وانتي لاء.. بس فيه كل المميزات واتقدملك مثلاً ترفضي عشان قلبك وللا توافقي عشان عقلك.. على اعتبار إن الحب ييجى بعدين؟
سمية: أها.. كده فهمت يا ضيا قصدك.. بص على رأيي الشخصي كده.. أهم حاجه الإعجاب.. ماينفعش عقلي موافق وقلبي لأ.. لازم الاقي فيه حاجه تحركني من جوايا عشان مواصفاته ماينفعش تشدني وأنا قلبي مش حتى معجب بيه.. يعني أنا في الحالة دي لو ماوصلتش لدرجه الإعجاب مش هوافق عشان عقلي.

ضياء: بس انتى هنا تكوني غلط على فكرة.. هتكوني بتضيعي فرصة كويسة لعلاقة ناجحة.
سمية: ممكن معاك حق.. بس لازم تكون البداية عن اقتناع.. ماقدرتش اقتنع بيه.. مش هقدر أكمل معاه.

ضياء : اقتناع يعني عقل.. واحنا أتفقنا إن عقلك موافق بس قلبك لسه.
سمية: لاء.. الاقتناع هنا قلب وعقل زي ما قلتلك.. يعتبر توافق بينهم وأي حاجه ناجحه تتم بموافقتهم.

ضياء: يا سمسم كل ده بيوديني للسؤال بقن المهم.. ممكن نأجل القرار.. بأننا نأجل العقل شوية أو نأجل القلب شوية؟
سمية: آه.. ينفع جداً ويكون قرار أو خطوة مريحه عشان الواحد مايتسرعش.. ممكن بعدين تتغير الصورة والقلب والعقل يلاقو تغيير.

ضياء: طيب بسبب العقل ممكن نكره حد بنحبه، أو بسبب القلب ممكن نقبل حد عقلنا رافضه؟
سمية: بص.. نناقش النقطه الأولى.. أولاً: دي كثير بشوفها في الأفلام العقل بيخلنا نكره حد.. بشوف إن ده مستحيل ممكن يكون العقل بحكم سيطرته بيربط الواحد ويخليه تحت رحمته و يوهمه إنه بيكره الإنسان ده بس مع الوقت لو كنا بنحب حد.. العقل أكيد هيوافق.. آه ممكن العقل يكون قاسي ويخلينا نبعد عن اللي بنحبهم.. عشان هو شايف إن مصلحتنا كده.

ضياء: بلاش يكره.. يرفض..، يبعد.
سمية: ممكن يكون شايف غلط.. نيجي للنقطة التانية.. آه بتحصل كتير لما نلاقي عقل ضِعِـف مع الوقت.. يعني في الحالتين اللي قلتهم يا ضيا التوازن والتوافق اللي قلنا عليهم في الأول.. في الحالتين دول مفيش توافق ويبقى حب ناقص في رأيي.

ضياء: بس شايف إن المهم في كل الحالات هو الإرادة.
سمية: بس الإرداة هتيجي منين.. ده دافع من العقل عشان تستمر مع الحد ده.. أو تكون دافع من القلب عشان تستمر يعني في كل الحالات.. العقل والقلب المفروض يكون ما بينهم توافق عشان هما أساس أي شعور حب بنحسه.

ضياء : ماعنديش نقط تانية.. انتي عندك حاجة عايزة تقوليها؟
سمية : بلاش نظلم العقل ونشوفه كتلة باردة.. هو مركز كل إحساس جوانا لازم نكسب عقلنا وبلاش نعلن الحرب عليه بقلبنا..
هما اتنين متكاملين..
بس كده.

هناك 4 تعليقات:

Bent Men ElZman Da !! يقول...

حوار مختلف عن حوارات كتييير سمعتها فى حكايه القلب والعقل فى الحب

بس انا مع رأي سميه جدااا بصراحه :))

أحمد أحمد صالح يقول...

حوار راقي و رائع جدا..يمكن مع سمية اننا نقدر نمنع نفسنا نحب و ده سهل للي عاوز لأني جربته،مادمت تحترم عقلك الذي فند لك كل ظروفك و ما حولك هيكون سهل قرارك..
أما نقطتك استاذ ضياء لما قلت لو جه حد مناسب و يقبله العقل ازاي يترفض،فالمسألة هنا ليست تعارض فأنا أسأل العقل لأقبل و أسأله لأرفض فاذا توافرت امام العقل اسباب القبول و رفض القلب نتبع القلب، أما اذا توافرت للقلب أسباب القبول و توافرت للعقل أسباب الرفض نتبع العقل و يصبح لا تعارض في الحالتين !!
..تحياتي

Hanan w Haneen يقول...

حــوار شيق .. بس ممكن القلب يسبق العقل وينجرف بمشاعره لحب شخص من معرفته كويس .. والعقل وقتها هيوافق لما يعرفه كويس ويلاقي مفيش مانع من حبـه .. فهنا مفيش مشكلة لو القلب سبق العقل فى القرار .. وانا عن نفسي مش بعرف اولـَـي عقـلي على قلبي .. للأسف قلبي هو اللى بيتحكم فيا بنسبة 90% :S

ضياء عزت يقول...

تمام يا دينا

ألف شكر على حضورك المميز دايما
------------

مبسوط جدا يا أستاذ احمد بتواجدك وبتعليق الرائع بصراحة

واقنعتني ^_^

دايما منورني والله
-----------

كويس إن الحوار عجبك يا حنان
كلامك مظبوط .. بس ده لو مفيش مانع .. طيب لو فيه؟؟ D:

بنوتة رومانسية زيك مش غريب يبقى ده رأيها وقرارها يكون من قلبها
^_^

نورتيني بجد وبكون مبسوط بتواجدك

ألف شكر

Translate