1 أغسطس، 2012

الحجاب.. تحدي!

دي حوارت عملتها مع اخواتي البنات على الميل وكانت نوع من الدردشة عادي.. فجأة طقت في دماغي اعملها حلقات وفعلا عملتها وتقريبا اتكلمنا عن كل حاجة تخص الحجاب.

الحلقة الرابعة مع أختي الفلسطينية ريم Reem

(الحجاب.. تحدي!)
-----------------
الحوار بتاريخ: 17-09-2009 08:11 AM

ضياء: قوليلي يا ريم انتي محجبة من إمتى؟
ريم: من خمس سنين وشويه تقريباً.. لما كنت في أولى إعدادي.
ضياء: فاكرة أول يوم اتحجبتي فيه؟
ريم: طبعا!
ضياء: إحكيلي طيب جت إزاي؟
ريم: ممممم.. هقولك يا سيدي.. أنا كنت عايزة اتحجب من قبل كده من وأنا بالإبتدائية.. بس بابا رفض وقاللي بس تفهمي الدين صح وكدة بعدين ابقي اتحجبي.. لغاية ما طلعت لأولى إعدادي وكنت بجد عايزة اتحجب وكلمت ماما كتير وبابا لغاية ما بابايا وافق يعني.. أول يوم اتحجبت فيه كان أول يوم في عيد الفطر.. يعني بعد رمضان على طول.. أول ما لبسته كنت رايحة لصلاة العيد.. اتحجبنا مع بعض أنا وأختي اللي أكبر مني بسنة وكنت قلقانة أوي على فكرة وكنت بحلم كتير إني أخرج من البيت وأنا مش متحجبة.. إني أنسى يعني وكدة.. بس.
ضياء: طيب قوليلي إيه أو مين اللي شجعك على الحجاب..
ريم: ماحدش.. أنا لوحدي.. أنا وأختي.. وبعدين إتفقنا أنا و واحدة صحبتي إننا نتحجب.. صحبتي دي أبوها شيخ وكان هو اللي عايزها تتحجب وهي طبعا كانت راضية ومقتنعة بيه بس هي اتحجبت قبلي.. أنا كنت عايزاه بإرادتي.. حاجة جوايا كانت مشجعاني عليه والحمد لله اتحجبت.
ضياء: الحمدلله.. ومن يوم ما لبستيه مش فكرتى تخلعيه أبداً؟
ريم: أبدااا.. ده على جثتي.. بجد بابا في الأول كان رافض لأنه كان خايف من كده.. بس أنا بجد مستحيل اعملها مهما حصل.. على فكرة أعرف بنات كانت لابساه وخلعته وبجد أي بنت بشوفها خلعت الحجاب بتنزل من عيني وخلاص يعني.. بجد حاجة مستحيل أفكر فيها مجرد تفكير.. بس.
ضياء: إيه الميزة اللي بتشوفيها في الحجاب؟
ريم: مممم.. حاجات كتيره بجد.. يمكن أهم ميزة في نظري إني بحسه بيحافظ على احترامي بجد.. و والله هو جزء مني ماقدرش استغنى عنه.. الحجاب بيزيد من احترام الواحدة فينا وأوقات بحسه بيحميني ماعرفش من إيه ومن مين.. بس بحسه كده!
ضياء: طيب لو عايزة تنصحي بنت في سنك بالحجاب تقوليلها إيه؟
ريم: الحجاب عايز إيمان من جوه.. لو كان موجود يبقى مفيش أي مشكلة.. هقولَّها.. أولا الحجاب ده فرض ربنا وكدة.. مش هتكلم أكتر عليه من ناحية الدين هحاول أفهَّـمها قيمته من ناحية اجتماعيه أكتر يعني إنه هو بيزيد من احترامها، وممكن كمان بنظري يزيد من قيمتها.. الحجاب هو زينة البنت.. هو اللي بيحافظ عليها، وبيحميها.
ضياء: تمام أوي يا ريم.. طيب هو بما إنك فلسطينية عايشة في القدس لازم طبعا أسأل عن وضعك كمحجبة في المجتمع ده.. وعايز أعرف عموما لو فيه صعوبات أو مضايقات بتحصل ليكي ولكل أخواتنا الفلسطينيات بسبب الحجاب.
ريم: كويس أوي يا ضياء إنك فتحت الموضوع ده.. علشان في كلام واقف في زوري عايزة أقوله.. ولو إنه بعيد شوية عن موضوع الحجاب..
ضياء: خدي راحتك!
ريم: انت عارف طبعا زي ما قلت إني عايشة في القدس.. يعني أنا من عرب 48 والحقيقة يا ضياء إحنا مظلومين أوي من كل الإتجاهات.. يعني مثلا بلاقي اللي بيتريق علينا إزاي مستحملين العيشة وسط الإسرائليين.. وبلاقي اللي بيسخر مننا واللي بيعايرنا بده.. هو احنا ذنبنا إيه يا ضياء؟!.. أنا مثلا اتولدت لقيت إن ده بيتي ودي بلدي ولقيت أهلي بيفهموني وضعنا الغريب ده وإننا لازم نعيش كدة ومانسيبش بلدنا ليهم.. همه فاكرين مثلا إننا مرتاحين، وللا مبسوطين أوي بالعيشة اللي عايشنها؟!.. ده يعني لو فاكرين إننا عايشين زي مخاليق ربنا.. يا ضياء الإسرائيليين بيمسحو أي حاجة عربية في القدس وأي حاجة إسلامية.. كل حاجة حوالينا صعبة ومرعبة.. في المدارس مفيش عربي بيجبرونا نتكلم عبري.. مفيش قرآن.. ولا دين إسلامي.. وفوق ده كله ماتلاقيش حد بيفهمك ولا يقدَّر ظروفك وييجي يسخر منك.. انت عارف انا نفسي في إيه؟
ضياء: اهدي الأول كدة وبعدين قوليلي نفسك في إيه..
"ريم هنا دخلت في وصلة عياط أد نص ساعة كدة :("
ريم: نفسي اللي بيتكلم عننا كدة ييجي يعيش يوم واحد بس مكانا!
ضياء: ولا هيستحمل نص ساعة وحياتك.. ياريم انتي سيبك من اللي بيقولك كدة واعرفي إن الأغلبية معاكم وبيعتبروكم أبطال ومقدرين ظروفكم والله وبيدعولكم دايما.. تعالي نرجع للصعوبات اللي بتقابلك كمحجبة في مجتمع بيمسح _زي ما قولتي_ كل حاجة عربية وإسلامية.
ريم: شوف يا ضياء.. رغم كل اللي بيعملوه.. مابننساش دينا ولا لغتنا.. أهالينا بيبعتونا نتعلم دين وعربي.. في السر طبعا!.. أو بيجيبولنا مدرسين يعلمونا.. وده بيجنن الإسرائيليين لأنهم فاكرين إنهم قدرو يمسحو كل حاجة ويطلعو جيل مايعرفش دينه ولا لغته.. فلما بيلاقو بنات صغيرين محجبات.. فطبيعي يضايقونا في المدرسة وفي الشارع وفي كل حتة.. وساعات ييجي يتكلمو معانا بالراحة وبالإقناع.. قال يعني هيضحكو علينا!
ضياء: إزاي بيكلموكو بالراحة والإقناع..آه.. وفيه نقطة تانية عايز استفسر عنها وهي إزاي بتروحو تتعلمو في السر دي!..
ريم: بص يا سيدي.. هقولك.. بنروح نتعلم عند ناس معينة احنا بس اللي نعرفهم واحنا رايحيين بنمشي في طرق برضه مش معروفة غير لينا.. ماتنساش إنها بلدنا برضه ونعرف نتوههم فيها..
ضياء: يا سلام عليكم.. هو ده الكلام!
ريم: موضوع بقى بالراحة والإقناع ده إن مثلا مدرسة تيجي تتكلم معايا بالراحة عن الحجاب.. يعني ليه لابساه.. انتي لسه صغيرة.. شكلك حلو من غيره.. كدة يعني.. وفيه كمان لما بكون ماشية بالحجاب ودخلت مثلا محل اشتري حاجة وللا كدة.. ألاقي الناس قال يعني متحضرين ومتقبلين وجودي عادي والاقيهم بيبتسمو في وشي.. وانا من جوايا ببقى عارفة كويس همه بيعملو كدة ليه!
ضياء: ما شاء الله عليكي.. تصدقي بالله؟.. انتي واللي زيك عندي أرجل مليون مرة من أي ابن ستين تيت بيتكلم عليكم.. دول لو اتحسبو رجالة يعني..  
ربنا يحميكي.. انتي وكل اخواتي في فلسطين ويارب دايما يثبتكم ويقويكم ويقدركم وينصركم..
إن شاء الله في يوم هقابلك في القدس.. وهنصلي في الأقصى.

هناك 8 تعليقات:

إيمي يقول...

انا متابعة الحلقات بس الحلقة دي عجبتني أكتر واحدة

لأن لها خصوصية ، أولا عجبني اقتناع البنت بالحجاب .. و ثانيا عشان بيثير القضية الفلسطينية

أما عن الحجاب فهي فكرتني بنفسي لاني برضه اتحجبت في سنها و كان نفسي اتحجب من قبل بكتير لكن بابا منعني لغاية لما افهم الدين كويس

و عن القدس .. هقول إيه
نفسي تعرف إننا مش ناسيين أبدا و كتير أعرفهم بنشتغل ليل نهار عشان الأمة دي تصحى و نعمل نهضة و نحرر فلسطين
لأن للاسف الحرب مع إسرائيل دلوقت خسرانة
ربنا ينصرنا و ينصرهم

متابعة

MEROOooOOoo يقول...

يااااااااااارب
اللهم آمين
ما شاء الله عليها
ربنا يحميها ياااااااارب

فى انتظار الباقى

أحمد أحمد صالح يقول...

اللهم أمين..
..
طبعا انت عارف رأيي في مجموعة الحوارات دي من بدايتها،و أعتقد انك لو جمعت مافيها من أراء- و ما ستنشره لاحقا- ستخرج بدراسة إجتماعية متقنة و صادقة عن الحجاب..
و طبعا أشارك إيمان بتأثري بإثارة القضية الفلسطينية و ما يعانيه اخوتنا الفلسطينين، الذي من المفروض ان نبكي له دم و ليس دموع..
..
تحياتي ضياء و دوما في انتظار القادم.

ريـــمـــاس يقول...

مساء الغاردينيا ضياء
حوار رائع واحيي اختي ريم على قناعتها الحقيقية بالحجاب قالت انها تشعر انه يحميها كيف لا تعلم ولكنها صدقت فالحجاب يحمي طهرها ونقائها ويصون مفاتنها كأنثى لمن يستحقها ولا اقصد فقط غطاء الشعر ولكن قصدت ان من تتحجب ستخفي صدرها والكثير من جسدها فالحجاب ليس بتغطية الشعر فقط كما انها ستشعر براحة نفسيه حقيقية اما وضعها في فلسطين فلن اقول سوى كان الله في عونهم ويارب نفرح بفلسطين قريبا عروساً تزفها الحرية "
؛؛
؛
سأكون متابعة بإذن الله
لروحك عبق الغاردينيا
كانت هنا
Reemaas

Deyaa Ezzat يقول...

إيمي

ألف شكر على المتابعة.. ويارب كل الحلقات تعجبك
وآمين يارب .. ومسير يوم تحرير القدس جي جي إن شاء الله

Deyaa Ezzat يقول...

MEROOooOOoo

ألف شكر

Deyaa Ezzat يقول...

أحمد أحمد صالح

إن شاء الله يا أحمد .. هعمل كدة في يوم بس بعد انتهاء الحلقات تماما

ألف شكر يا صديقي

Deyaa Ezzat يقول...

ريـــمـــاس

مساء التوليب ريماس
واشاركك الاعجاب بريم وبكل اخواتنا في القدس المحتلة
وربنا معاهم ونصرهم قريب بإذن الله

متابعتك تسعدني أكيد

ألف شكر

Translate