27 أغسطس، 2012

مش فرحانة بسؤالك!


الديو ده كتبته مع صديقتي الموهوبة الجميلة ياسمينا سعيد Yasmina Saied
والحقيقة الشغل مع ياسمينا بقى متعب قوي @: .. بس مانكرش إنه جميل $: .. بتمنى يعجبكم

** كان عقلي منفي.. وكل همي إني أجيلك أطمن عليكي
ماهمنيش ضعفي.. ولا شكلي ساعتها هيبقى إيه في عنيكي
ماحسبتهاش..
كان الحنين معذبني.. وضميري كان بيغصبني
وقلبي مش مريحني

#لا والله فيك الخير.. دايما قلبك كبير
هو ماحدش قالك إني.. في بعدك عني
إرتحت كتير؟!
أيوة بقولك ريـّح بالك.. أنا مش فرحانة بسؤالك
وفره ليك
بيفكرني بظلم ماليك
وبيجرحني

** كنت فاكر باقي ليا حاجة لسه
قلبي جابني قاللي يمكن تلقى فرصة
لقيت مابيني وبينك سد
جوه عيونك نطق الرفض
همشي خلاص فهمت الرد
كدة لازم أنسى

# صح وصلتك الرسالة عادي جدا لو هتمشي
سهلت عليا الحكاية وياريت تاني ماترجعشي
انسي قلبي مش هيسامح.. جرحك لسه معلم فيا
لسه بعيش اليوم في إمبارح.. وبكرة الشمس تنور ليا
وهسيبك لضميرك ولتأنيبه
قلبي اللي انت كنت حبيبه
انت بجد زمان ضيعته
لما قطفت فرحي الطارح.. بظلمك فيا

هناك 12 تعليقًا:

أحمد أحمد صالح يقول...

جميلة جدا جدا يا ضياء و كلماتها لمستني جدا جدا جدا..أبدعت يا صديقي.

MEROOooOOoo يقول...


رووووووووعة يا ضياء
بجد تسلم ايدك وابداعك

Samah Ibrahim يقول...

فعلا رووووعة جدا يا ضيا كعادتك دايما ربنا يوفقك

ريـــمـــاس يقول...

صباح الغاردينيا ضياء
دويتو رائع تحياتي لك وللجميلة ياسمينا"
؛؛
؛
لروحك عبق الغاردينيا
كانت هنا
Reemaas

mohamed يقول...

حلوه بجد
تحياتى لابداعك الدائم

إيمي يقول...

ما شاء الله
عاملين شغل حلو أوي

تسلم إيدك و إيد ياسمينة

Deyaa Ezzat يقول...

أحمد أحمد صالح
صديقي الجميل.. وجودك الدالراقي الدائم هو الأجمل فعلا
ألف شكر

Deyaa Ezzat يقول...

MEROOooOOoo
ربنا يخليكي يا مروة
مبسوط والله إن الديو عجبك

Deyaa Ezzat يقول...

Samah Ibrahim

سماااااااااااااح
منور يا جميل بجد.. واتبسطت أوي لما شفتك هنا
ويارب على طول بقى ماتحرميناش منك ^_^

Deyaa Ezzat يقول...

ريـــمـــاس

مساء التوليب صديقتي الراقية الرقيقة
ألف شكر بالأصالة عن نفسي وبالنيابة عن ياسمينا

Deyaa Ezzat يقول...

mohamed

صديقي العزيز
حضورك بجد الأروع

ربنا يخلييييييييييك

Deyaa Ezzat يقول...

إيمي

تسلمي يارب
ألف شكر

مبسوطين إن الديو عجبك

Translate