وجع الفراق

ديو مع صديقتي الجميلة الموهوبة سمر عبد الله Samar Abdallah
الديو بتاريخ 05-03-2009    11:51  PM

** باتعذِّب، بعاني

جراحي وجعاني

من يوم بعادِك عمَّال أموت

قلبي بيبكي ومالهش صوت

حياتي ع الهامش.. وكأني مش عايش

تايه جوة حيرة متوهاني مضيعاني

ثواني، دقايق، عمري يفوت

حبيبتي تعالي وبلاش السكوت

قاتلني إحساسي.. إن قلبك ناسي

وعنيكي مش حاسة وانتي ولا سمعاني

##  قلبي موجوع

وعيني غرقانة ف الدموع

وبتنده عليا وأنا مستنية الرجوع

حبيبي أكيد سمعاك

فكراك ومش نسياك

حساك عشان عيشاك

واللي انت حاسس بيه.. أنا عايشة زيك فيه

متشوقة للقاك

ماهو انت حب حياتي

حكاياتى وذكرياتي

لو حتى سبب في آهاتي

قولي هنسى إزاي.. وقلبي يكون نساي

وعيني تنسى هواك

** الشمس غيم والقمر مخنوق

حياتي غروب مافيهاش شروق

مش حاسس بفرحة.. كل حاجة جارحة

أحلامي ودعتني وانتي مودعاني

وخداني دوامة مش قادر أفوق

عاجز وخايف م النار بدوق

ليلي غميق.. ولا شايف طريق

ماهو انتي الطريق والنور والمعاني

##  أنا بس بعدت عنك

عشان حسيت بإنك

متغير قوي حضنك

معاك ومش معاك

مستهتر بمشاعري وبيا

مش عامل حساب ليا

قلت أبعد عنك شوية

وأعرف إيه جواك

وتدوق سهر الليالي

وتحس بعذاب حالي

وأعلمك إزاي تشتاق

تفهم معنى ناري

وتدوب شوق ف انتظاري

وتعرف قيمتي بالفراق

وحبك يزيد ليا.. ولما ترجع ليا

تحافظ عليا وأنا وياك