8 أغسطس 2012

الحجاب.. دعوة!


دي حوارت عملتها مع اخواتي البنات على الميل وكانت نوع من الدردشة عادي.. فجأة طقت في دماغي اعملها حلقات وفعلا عملتها وتقريبا اتكلمنا عن كل حاجة تخص الحجاب.
الحلقة الخامسة مع أختي المصرية دينا ممدوح Dina Mamdouh Mohamed
(الحجاب.. دعوة!)
-----------------
الحوار بتاريخ..  من : 1 / 8 / 2012 : 5 / 8 / 2012 
ضياء: إمتى وإزاي اتحجبتي؟
دينا: اتحجبت بالظبط في الترم التاني من تانية ثانوى كان عندي 15 أو 16 سنه تقريبا.. فكرة الحجاب أصلاً كانت في دماغي من قبلها بس كنت خايفة ومترددة جدا وكمان ماما مش كانت موافقة.. بس كان فى بنت معانا في المدرسه مشاغبة جدا ومش ملتزمة بأي شكل من الأشكال فجأة لقيناها التزمت ولبست الحجاب.. الطُرح الكبيرة دي كمان.. وبقت حد ملتزم جدا ما شاء الله عليها.. أنا مش كان ليا علاقة بيها أوي بس لقيتها جاية في يوم تكلمني أنا وصاحبتي عن الحجاب وإني ليه مش محجبة والكلام ده جابتلي شريط عمرو خالد كان بيتكلم عن الحجاب قولتلها هابقى أسمعه.. بس هي أصرت إنها تجيبلي كاسيت صغير كده أسمع فيه الشريط وكل ده في المدرسة خلي بالك.. إحنا مدرستنا كانت متطورة في الإمكانيات شوية :D
فعلا قعدنا نسمعه وكنت أول مرة أسمع عمرو خالد أصلاً بس عجبني جدا كلامه واقتنعت بيه ولأن الحجاب كان في دماغي من قبلها فحسيت إن دي الرسالة اللي ربنا بعتهالي عشان اتحجب ومن وقتها مش قلعت الحجاب الحمدالله :)
ضياء: جميل أوي.. كلامك ده بيوديني لموضوع مهم وهو.. قدرة الدعاة على الإقناع والتأثير (بالسلب أو الإيجاب) على قرار بنت عايزة تتحجب.. انتي بتقولي سمعتي عمرو خالد واقتنعتي.. رغم إن الفكرة كانت موجودة من الأصل.. تفتكري يا دينا لو سمعتي داعية تاني نقول إنه متشدد شوية وبيستعمل أسلوب الترهيب بس.. كان قرارك اختلف؟
ولو ماكانتش الفكرة جواكي أصلاً.. كنتي اتأثرتي برضه بكلام عمرو خالد وللا لاء عادي؟
وعموما يا دينا.. من وجهة نظرك.. شايفة إن الخطاب الديني محتاج تطوير شوية أو تعديل في مسألة الحجاب؟
وكمان عايز أعرف أكتر الكلمات اللي سمعتيها من عمرو خالد أثرت فيكي جدا..
دينا: أكيد الدعاء ليهم تأثير جدا علينا على فكرة عموما.. بس الفكرة في ياترى تأثيرهم ده لحظي وللا ممتد المفعول زي ما بيقولو..
لو سمعت أي داعية تاني متشدد اعتقد كان هيخليني أخاف أكتر من فكرة الحجاب ويخليني أبعد عنها أكتر ده راجع لشخصيتي أنا العنيدة!..، وراجع كمان لطريقته اللي المفروض إنه يقنعك باليسرى مش بالعسرى.
بالنسبة لو الفكرة أصلاً مش كانت جوايا بيتهيألي كان شريط عمرو خالد ده هيكون بداية لطرح الفكرة في دماغي وأكيد هييجي بعدها الحجاب بس مش فجأة زي ما حصل أول ما سمعته.. يعني أكيد هيكون ليه تأثير كبير برضه.
أنا بالنسبالي في حكاية الخطاب الديني دي ببعد تماماً عن المتشددين ومش بحاول أصلاً أسمعهم لأني مش بحب طريقتهم.. بس فيه شيوخ ودعاه كتير طريقتهم بقت مُبـَسـَّطَة جدا لكن ده مايمنعش إن طريقة الخطاب الديني عموما محتاجة تعديل.. لأن كتير منهم بيوحي بفكرة غلط تماماً عن الإسلام وبيرهَّب منه قبل ما يكون بيرغب فيه.
مش فاكرة بصراحة أوي الشريط اللي سمعته لأنه بقاله كتير بس فاكرة إنه مع كل جُملة كان بيقولها كان بيرسم ابتسامة على وشي ونية وقرار جوايا إني ألبس الحجاب.. أصلاً طريقة عمرو خالد جميلة وابتسامته أصلاً بتخليك تبتسم!
ضياء: إنك تلبسي الحجاب في فترة المراهقة بكل ما فيها من تمرد وتناقضات.. أثـَّر عليكي إزاي ؟.. سواء بالإيجاب أو السلب؟
وإيه من وجهة نظرك أنسب سن للبنت تتحجب فيه؟
ولو عايز أقنع مراهقة بالحجاب.. إيه أكتر حاجة ممكن تقنعها؟
دينا: أكيد أثـَّر عليا بالإيجاب لكن مع الوقت.. مش فجأة لأني ماتغيرتش فجأة أول ما لبسته.. التغير من حال لحال فجأة ومن غير تعوّد ممكن يخلينا مع الوقت نضعف ومانقدرش نستمر فيه لكن بالوقت انت بتتعود على التغير وبالتالي هيكون جزء من شخصيتك اللي انت متعود عليها.. والتمرد اللي جوايا ده هو كان من الأسباب الأولى أصلاً لترددي في لبس الحجاب!
أنسب سن للبنت دينيًا أكيد أول ما تبلغ.. لكن المشكلة بتبقى في إن لازم البنت تبقى واثقة من فكرة ارتدائها للحجاب دي عشان ماينفعش تلبسه وبعدين تخلعه لإنه مش لعبة.. لازم لما تلبسه تبقى عارفة إنه بقى جزء منها ومن دينها اللي لازم تحافظ عليه.. وعشان كده أنسب وقت للبنت تلبس الحجاب فيه لما تبقى هي من جواها حاسة إن ماينفعش خلاص تمشي من غير حجاب وتبقى مقتنعة بيه تمام الاقتناع.. وربنا لما بيحب يهدي حد مش بيكون بوقت أبدًا :)
ضياء: طيب ماجاوبتنيش على السؤال الأخير..، وفيه حاجة تانية.. فيه بنات الحجاب بالنسبالهم هو غطاء للرأس بس.. وفيه بنات الحجاب عندها زيّ متكامل.. بتراعي فيه مايكونش ضيق أوي أو ملفت.. هسألك حاجتين .. أول حاجة.. بالنسبة لدينا الحجاب أنهي فيهم؟.. وليه؟
تاني حاجة.. إيه رأيك في اللي بينتقدو البنت اللي بتعتبر الحجاب غطاء رأس بس.. وبتلبس ضيق أو ملفت.. انتي مع النقد ده.. وللا مش معاه؟.. وليه؟
دينا: معلش نسيت السؤال الأخير.. تقنع مراهقه إزاي.. هو حسب شخصية المراهقة دي نفسها وحسب الطريقة اللي بتقتنع بيها لأن ماينفعش تلبس الحجاب بالقوة وإلا مش هتلتزم بيه.. يعني بالاقناع بنصوص القرآن اللي ذُكر فيها فرض الحجاب على المرأة وكمان بالأحاديث وبعدين بنظرة المجتمع وحاجات كتير أوي بتحددها عقلية البنت اللي هتتحجب.
الحجاب أكيد مش غطاء للرأس بس لأني المفروض اراعي كل تصرفاتي عشان حجابي هو مش مثال ليا أنا وبس ده مثال كمان لديني.
أنا بصراحه الحجاب بالنسبة ليا وسطي.. يعني أنا مش بلبس لبس ضيق أو ملفت لكن مثلاً بلبس بناطيل عادي وعليها تونيكات طويلة ولو حاجة قصيرة شوية بلبس عليها جيب.. يعني براعي حكاية اللبس المناسب للحجاب.
أكيد اللي بينتقدو رأيهم صح بس أنا عايزة أقولك على حاجة.. فيه كتير من البنات بطبعهم بيحبو العند.. يعني لما تقولّها اللبس ده وحش تقولك طب أنا هالبسه بالعند فيك :D .. النقد حلو لما يكون هيؤدي لتغير إنما مش حلو لما يكون لمجرد النقد والتعقيد وخلاص.
ضياء: عندك حق في حتة العند دي فعلا.. شفت ده بنفسي..
طيب آخر حاجة.. فيه مواقف مميزة أو مهمة حصلتلك مع الحجاب تحبي تقوليهالنا؟
دينا: حتة العند دي بتضايق في حاجات كتير أوي أنا مجربة :)
من أهم المواقف اللي فاكراها.. إن صاحبتي أول ما شافتني اتحجبت أنا وصاحبتي التانية اللي كنا بنسمع شريط الحجاب وخدنا القرار فجأة هي كمان اتحجبت في نفس اليوم كنت مبسوطة بينا أوى إحنا التلاتة..
فيه موقف بقى طريف كده حصللي أول ما اتحجبت بس من غير ما حد يضحك عليا بقى ^__^
طبعا في الأول كده مش كنت لسه واخدة على فكرة الحجاب وكده
فكنت مرة عند صاحبتي ونازلين نصور ورق ونزلنا على طول.. لما وصلت المكتبة لقيت مراية فيها.. ببص لقيتني مش لابسة الحجاب:O .. طبعا اتصدمت ولأن صاحبتي وأنا كنا لسه جداد في الحجاب فهي كمان مش ركزت.. توهان الثانوية العامة بقى :D .. أنا طبعا سكتم بكتم لحد ما رجعنا تاني البيت.. أول ما مامتها شافتني قالتلي.. إيه ده يا دينا انتي نزلتي من غير الطرحة قولتلها آه يا طنط أصلي نسيت :D
بس الحمدالله من ساعتها ماحصلتش تاني وإلا كانت هتبقى مصيبة يعني  :D
ضياء: ههههههههههههههههه معلش بقى لازم أضحك:D  !

هناك 15 تعليقًا:

مروه زهران يقول...

الداعية فعلا بيأثر جدااااا ، عمرو خالد ومصطفى حسنى بيتكلموا بحب ، بطريقة تحببك مش تخوفك ، تحس انهم حد من عيلتك بيحبك وخايف عليك
لكن فى شيوخ ممكن مش يكونوا بيخوفوا ، بس بيتكلموا بصوت عالى ، كأنهم بيتخانقوا ، بصراحة أول ما باشوفهم بقفل التليفزيون من غير ما أسمع هما عايزين يقولوا ايه

حوار جميل جداااا

Bent Men ElZman Da !! يقول...

كنت سعيده جدا بالحوار معاك يا ضياء
وربنا يوفقك دايماً وتسلم افكارك :)

أحمد أحمد صالح يقول...

و مازالت الحوارات مستمرة !!
أتمنى منك يا ضياء أن لا تترك هذه الحوارات مجرد حوارات أو تدوينات ؛ أتمنى ان تعيد صياغتها بإضافة بعض الأراء الشخصية، أو الأصول الفقهية أو ما الى ذلك و نشرها في كتاب، و أظنه سيكون كتاب رائع جدا و دراسة شافية في هذا الموضوع خاصة أنه يعرض أراء متنوعة.
..
تحياتي يا صديقي

Tasneem Adel يقول...

جميل يا ضياء

ضياء عزت يقول...

MEROOooOOoo

تعليقك وحضورك همه الأجمل دايما

ألف شكر

ضياء عزت يقول...

Bent Men ElZman Da

أنا الأسعد والله يا دينا ومن غير مجاملة
ردودك ومنطقك طلعو حلقة مفيدة وغطت مساحة مهمة في الموضوع

ألف ألف شكر بجد

ضياء عزت يقول...

أحمد أحمد صالح

إن شاء الله يا أحمد هعمل ده.. بس لما اتناقش في الموضوع من كافة الوجوه
ومع بنات من اتجاهات فكرية مختلفة

ألف شكر على اهتمامك يا صديقي

ضياء عزت يقول...

Tasneem Adel

وجودك الأجمل يا تسنيم بجد

ربنا يخليكي

ألف شكر

كريمة سندي يقول...

حوار صريح ومفيد ووقع على الجرح .. لدى الكثيرين .. استمعت بما قرأت أستاذي الفاضل ضيا ربنا يكرمك يارب

ضياء عزت يقول...

كريمة سندي

أستاذ إيه بس.. العفو يا أستااااذة

مبسوط إن الحوار عجبك بجد

وألف شكرررررررر

ظلالي البيضاء يقول...

السلام عليكم ..
علاقة الصداقة على الفيس والمدونات علاقة متعدية .. يعني صديق صديقي هو صديق محتمل لي ..
وذلك لأن المثل يقول :"قل ل من تصادق أقل لك من أنت"
وبما أن أصدقائي في بلوغر والنت كلهم على قدر من الأخلاق والأدب الرفيع والروح الطيبة والنفس الزكية .. فإن أصدقاءهم يحملون الصفات نفسها أو معظمها ..

لفت نظري تواجدكم في مدونات صديقة فأحببت أن أتقرب أكثر ..

فسعدت بما قرأته ههنا ..
كان من الممكن أن يكون لي تعليق طويل نوعاً ما هنا ... لكنني آثرت ف بداية تواجدي أن أكتفي بمجرد الإشادة بكم وبما قرأته من حواركم الطيب ..

فتحيتي الطيبة لك .. كما تحيتي الطيبة لأختنا دينا .. ولكل من تواجد هنا ..

أخوكم .. أبو أسامة ..

faroukfahmy يقول...

الاخ ضياء عزت

انضممت الى متابعينك لما رايت فى مدونتك من تجديد فى العرض
بقدر ما لحواراتك من جاذبية العرض بقدر مالها من افادة
ارجو ان تكون من متابعينى حتى اواصل اعمالك الجليلة

ضياء عزت يقول...

ظلالي البيضاء
أبو أسامة.. كلامك يسعدني ويشرفني يا صديقي
وربنا يديم المعروف إن شاء الله
ويارب دايما أكون عند حسن ظنك

ألف شكر.. نورتني بجد ويارب دايما

ضياء عزت يقول...

faroukfahmy58

مبسوط أوي برأيك في مدونتي المتواضعة
ألف شكر بجد على غهتمامك ومتابعتك.. وتمت المتابعة لك أيضا صديقي

نورتني

ضياء عزت يقول...

منجي باكير

كل سنة وانت طيب يارب وبخير دايما

Translate