3 يوليو، 2012

طير في السما: يوم التدوين الموحد

طير في السما.. مابحبش الأسوار ولا القيود ولا أي حاجة بتتحط  بين قوسين..
يمكن السما المكان الوحيد اللي يساع أحلامي علشان هي المكان الوحيد اللي مالوش حدود..
بحب الحياة وبحب أعيشها في أي صورة وفي أي ظروف.. حتى أوقات الضعف والألم والحزن.. إيمانا بقول الرائع صلاح جاهين: " ما أحلى الحياة حتى في هيئة نبات!"
بعرف اتعامل مع الدنيا ولو زعلتني آخد حقي منها.. عارف إن بكرة أحلى .. وإني بكرة هطول النجوم بإيديا.
أبويا وأمي أكتر بني آدمين بحبهم.. طبعا بحب أخواتي وأصحابي وكل الناس بس مش زيهم .. D:
الكتابة والقراءة أكتر حاجتين بعشقهم.. طبعا بحب السينما والبلاي ستيشن ولعب الكورة.. بس مش زيهم.. D:
عارف نفسي.. وتعبت علشان أعرفها.. دورت عليها كتير.. وياما اتخانقنا وافترقنا واتصالحنا والتقينا واتعاتبنا وزهقنا من بعض حتى.. بس في الاخر شايف إن أكتر حاجة ممكن تكون مميزة فيا هي إني عارف نفسي  :)
في يوم ما قررت إني أسيب بلدنا وأصفِّي كل شغلي هناك وأقرر إني أعيش في القاهرة وأبدأ أحقق أحلامي المركونة بقالها كتير بسبب ظروف كتير.. كانت لحظة التحول في حياتي اللي راهنت عليها.. وإن شاء الله عارف إني هكسب الرهان.
عرفت عالم التدوين والمدونات من فترة كبيرة.. عن طريق مدونة سياسية معروفة جدا اسمها ابن بهية.. وبعدين الوعي المصري لوائل عباس ومدونات نوارة نجم وعلاء سيف.. بعد كدة عجبتني جدا مدونة غادة عبد العال.. كل ده وماكنش لسه عندي مدونة ولا بفكر..
بعد كدة بفترة حاولت أعمل مدونة جماعية  أكتب فيها أنا وصحابي بعد ما مشينا من منتدى كنا بنكتب فيه.. وفعلا عملتها وكان اسمها عيون .. بس ماحدش التزم من المجموعة إنه يكتب حتى أنا وحذفتها.. ورجعت قررت أعمل المدونة دي بعد ما  نزل كتابي الأول.. علشان أجمع فيها كل اللي بكتبه.
أعدت أفكر كتير اسمِّي المدونة إيه .. كنت عايز اسم سهل نطقه بالعربي وبأي لغة أجنبية وفي نفس الوقت يكون بيعبر عن محتوى المدونة.. فلقيت اسم بيبان مناسب جدا.
مدونتي هي مدونة أدبية بالدرجة الأولى.. بنشر فيها كل حاجة أدبية بكتبها .. مقالات، مقالات قصصية، أغاني، قصايد فصحى وعامية، خواطر، قصص قصيرة، وقصص مسلسلة.. هي عبارة عن أرشيف شخصي لأعمالي.
فيه مدونات بحبها وبحب أدخلها أوي بس مش لدرجة أثرت فيا.. زي مدونة وائل عباس ومدونة سارة درويش بحبها جدا
ومدونة أحمد مجدي.. ودلوقتي بيعجبني مدونات كتير اتعرفت عليهم من خلال حدث التدوين اليومي .. وخايف أكتب أسماء أنسى حد بجد.
من بره عالم التدوين فيه أدباء كتير وشعراء اتأثرت بيهم زي نزار قباني طبعا وباولو كويلهو ونجيب محفوظ  وأحمد مطر ومحمود درويش وصلاح جاهين ومصطفى محمود والأبنودي ويوسف إدريس وتشيخوف وإدجار آلان بو .. مممم والذاكرة مش بتسعفني كالعادة في المواقف دي :D
بكتب في أي وقت وأي مكان وأي ظروف.. مابعملش حاجات معينة علشان أكتب.. المهم تجيني الفكرة وأحس بيها وأعيشها.. بس لو فيه حاجة مطلوبة مني إني اكتبها وأخلصها في وقت معين فلازم هنا الهدؤ التااااااام.
مابحبش اكتب على الكييبورد مباشرةً.. بحب أبدأ أي حاجة على الورق واكتبها بقلم رصاص أو بقلم أسود..
بشخبط كتيييييير جدا على الورق وأنا بكتب وارسم حاجات عجيبة مالهاش أي معنى.. ولو حد أخد ورقة بكتب فيها مش هيفهم منها أي حاااجة D:
مش حريص على التدوين بشكل يومي، ولا حريص على الإنتشار السريع ويبقى عندي مليون زائر أو متابع والسلام.. بنشر على المدونة الحاجات اللي تستاهل النشر بعد مراجعتها ويهمني أوي إن اللي يدخل يقرا يكون حد فاهم.. حتى لو مادخلش المدونة غير واحد كل يوم .
أكتر حاجة شايفها ممكن تكون مميزة لمدونتي هو التنوع في في الإنتاج.. صحيح هي مدونة أدبية.. بس فيها كل أنواع الأدب تقريبا.. اللهم إلا الرواية.. وإن شاء الله قريب لما اخلص روايتي اللي بكتبها دلوقتي هبدأ في نشرها.
في الفترة الأخيرة انتشر التدوين وتنوع ودة كويس أوي طبعا.. مع وجود عيوب لكدة لكن المميزات أكتر.

أقرب تدوينة ليا هي الرباعية دي :
http://deyaaezzat.blogspot.com/2011/11/1.html
أنا طير في السما في بلاد الله سارح
عايش يومي وببص لبكرة وبتعلم من إمبارح
و ف وسط ناس بقابلها وظروف
لا عايز انجرح ولا عايز أكون جارح

بكل بساطة بقولني فيها.. طير في السما.. بعيش الدنيا وبحبها.. ومش عايز لا اجرح ولا انجرح
مممممممم لسه مفيش مواقف غريبة او طريفة قابلتها.
للتدوين أكيد تأثير إيجابي عليا.. خلاني اكتب أحسن وأكتر .. خلاني أعرف ناس مهتمين باللي بكتبه .. وطبعا خلاني انتشر أكتر
سؤالي عايز أوجهه لهبة الله (Hebatullah Nazmy) صاحبة مدونة تحت البكونة
هبة..  مش خايفة من السخافات أو الفهم الخاطيء لشخصك أو حتى المضايقات وسؤ الظن بسبب جرأتك في التدوين وفتح باب على حياتك الشخصية ؟؟
ولو حصلك موقف وحش بسبب تدوينة ليكي .. ساعتها هتندمي وللا لاء.. عادي.. مش فارق معاكي؟؟

هناك 13 تعليقًا:

Śђąžล ฬąђ٤єĐ ♥ يقول...

أجمل شئ إن الانسان يعرف نفسه
ومهما بعد او تاه عنها يرجع يلاقيها تاني

ربنا يوفقك :)

شيرين سامي يقول...

ضياء تدوينتك جميله و عرفتنا عليك أكتر واضح إنك راسم لنفسك طريق أتمنى تحقق كل اللي تتمناه و متبعاك بإذن الله :)

تحياتي لك

Aya Mohamed يقول...

عجبتنى الرباعية جدا جدا اوى يعنى
لدرجة رهيبة جامدة جدا :)))
بجد استمتعت جدا بالتدوينة
ربنا يوفقك فى حياتك وتوصل للى نفسك فيه يارب

Aya Mohamed يقول...

عجبتنى الرباعية جدا جدا اوى يعنى
لدرجة رهيبة جامدة جدا :)))
بجد استمتعت جدا بالتدوينة
ربنا يوفقك فى حياتك وتوصل للى نفسك فيه يارب

richardCatheart يقول...

انا جييييييييييت ومبسووووووووطه انى هنا يا ضياء انا حبة اشكرك على متابعك الجميلة للمدونة عندى وجودك زادنى حقيقى :)

طريقة اجابات عجبتنى جميل اننا نشوف نفسنا وغيرنا يشوفنا انا كمان بعشق الحرية والطيران بس نفسى انا اللى اطير زرع جناحات ياعنيى ههههههههههه وبكتب زيك بالرصاص وبشبخبط وماحدش يعرف يقرا اللى اتكتب غيرى ههههههههههههههههههههههههههههه ربنا يخليك اهلك وحابيبك ويارب من جميل لاجمل يا ضياء وان شاء الله فى تواصل مستمر :)

أحمد أحمد صالح يقول...

بصراحة يا استاذ ضياء موضوع ( اللي يدخل مدونتي يكون حد فاهم ) بيقفل عليا الباب برة !! مشيها للكل عشان أقدر أدخل !!
...
استمتعت جدا بحديثك عن نفسك،و حبيت فيك معرفنك التامة لهدفك و سعيك لتحقيقة..واضح اني بحب الحاجات اللي مش فيا !!
بالتوفيق و النجاح الدائم و السعادة الدائمة بإذن الله..تحياتي

Deyaa Ezzat يقول...

بشكر اهتمامك بالتواجد والتعليق
يا شذى
ويوفقك يارب دايما
-------------

ربنا يخليكي يا دكتورة شيرين
وآديني بسعى وربنا يعمل اللي فيه الخير إن شاء

شرف ليا بجد إن حضرتك تتابعيني ^_^

-------------

طيب تمااااااااااام
مبسوط والله ان الرباعية عجبتك يا أستاذة آية

وانا استمتعت بحضورك وتعليقك

ألف شكر
-------------

نووووووووووووووووووووورتي أستاذة ناريمااان.. وانا اللي مبسوووط والله ..ومفيش شكر ولا حاجة الحقيقة مدونتك جميلة جدا وأنا بحب اكون فيها يعني بعمل حاجة بحبها وماتستهلش الشكر *_*

حلووووووو.. اجمل شيء الخيال والحرية والحلم
هههههههههه.. وكويس بقينا كتير اهو
ههههههههههه

امين يارب وانتي كمان يخليلك كل اللي بتحبيهم يارب

وعلى تواصل إن شاء الله
-------------

العفو يا أستاذ احمد
حضرتك من الناس اللي تواجدهم اضافة ليا بجد وتعليقك بيكون مهم جدا ومش تعليق والسلام
وكلمة حد فاهم.. فعلا بقصدها .. لأنه موضوع محبط جدا بجد

والفهم مش بس تعليم وثقافة .. بقصد كمان الروح والاحساس

إنه يحس ويعيش مع الكلمة

نورتني ومشرفني تواجدك الدايم

وربنا يديم المعروف

MEROOooOOoo يقول...

أحلى حاجة ان الانسان يكون عارف نفسه
الراعية جميلة جدا

بالتوفيق ان شاء الله فى حياتك وأحلامك

Menna يقول...

اولا بقى انا بحب الاغنية علشان كده عجبتني التدوينة من عنوانها اصلا :)
http://www.youtube.com/watch?v=WgIomY-CQkk
يا رب ديما حر و سعيد
مبسوطة اني عرفتك اكتر و بعتبر اني كسبت صديق و اخ جميل من خلال الحملة اسمه ضياء :)

سندباد يقول...

جميل اوي التحدي اللي انت عملته وجميل اوي الانطلاق والتصالح النفسي اللي بينك وبينك نفسك
سعيد بمعرفتي بيك وبالتوفيق يارب ان شاء الله

Deyaa Ezzat يقول...

مع إن ده مابيكونش سهل أبدا يا ميرو
بس فعلا هو احلى حاجة لأنه بيوفر بعد كدة عليكي توهان كتير ومشي في سكك مالهاش لازمة

منورااااني تمللي .. ويارب كدة على طول
-------------

أنا كمان بعشقها والله يا منة وكويس طيب إني عملتها عنوان للبوست علشان تيجي وتنوريني كدة ..

آمين يارب انا وانتي وكل اللي بيحبو الحرية

مبسوووووووووط أكتر والله يا منة وربنا يديم المعروف .. وشرف ليا ومكسب حقيقي صداقتك

على تواصل إن شاء الله
------------

الأجمل تواجدك والله وتعليقك يا أستاذ أمجد

أنا أسعد بحضورك والله وبمعرفتك وتشريفك لمدونتي

ألف شكر

Amira Ahmed يقول...

أولا عجبنى اووووووووى ثقتك فى نفسك وانك راسم طريقك كويس وواثق انك فى يوم من الايام هتبقى زى ما بتحلم وبتتمنى
وانا سعيدة جدا بالثقة دى لان كتير من الناس مش بيبقوا عارفين هما عايزين ايه ولا هدفهم فى الحياة عشان كده سعيدة وبتمنالك التوفيق فى حياتك وتحقق كل أحلامك باذن الله
ثانيا انا عرفت مدونتك من خلال حملة التدوين وسعيدة جدا انى دخلت هنا

بتمنالك مزيد من الابداع والتقدم :)))

Deyaa Ezzat يقول...

والله يا أميرة أنا الأسعد بكلامك الجميل ده
وفعلا حملة التدوين عرفتني على ناس جميلة أوي

ربنا يديم بينا التواصل والمعروف

مبسوط بجد بإنك بتنوري المدونة

ألف شكر

Translate