ده جد!

 بقلم:

Shimaa H. Abduallah

على صفحة: شيماء عبد الله

ده جَــد
 و مُش هِـــزار ولا عِنــد
 و آخــر مرّة هـقولهـالك
 مــاليش دعوة بـ طريقة حَـد

 مـادام حبتني على شكلي
 على طريقتي
 على جناني
 على عقلي
 على طيشي
 على طيبتي
 معــاك ديماً على طبيعتي
 مابتصنعَّش
 ولا بتلَّف بـ الألوان
 ولا بتغيَّــر .. ولا بتحوِّل
 عشـــان
 أعجب مــرة أو مـا اعجبش !

 أنـا زي مانت وصفت فـ أول مرَّة
 قـولت براءة ..
 حنـان طفلة .. و طيبة أم
 و أجمل حاجة إنـــك حُـــرة !
 و لون عينك طبيعية
 بـ لون الشمس مسقيَّة
 و لون البشرة وردية
 لا هي ألوان .. ولا صناعية

 مـادام حبتني على شكلي
 على طريقتي
 على جناني
 على عقلي
 على طيشي
 على طيبتي
 معــاك ديماً على طبيعتي

 فـ ماتندهنيش بـغير اسمي
 و لا تقارني فـ يوم مع حد !
 ده جَد و مُش هـِزار ولا عِند

للمتابعة على صفحة "طير في السما".. من هنا: