28 يوليو، 2012

الحجاب.. بمزاجي!

دي حوارت عملتها مع اخواتي البنات على الميل وكانت نوع من الدردشة عادي.. فجأة طقت في دماغي اعملها حلقات وفعلا عملتها وتقريبا اتكلمنا عن كل حاجة تخص الحجاب.

الحلقة الثالثة مع أختي اللدودة المصرية ياسمينا سعيد Yasmina Saied

(الحجاب.. بمزاجي!)
-------------------
29-09-2009 03:45 AM

ضياء: إحكيلي قصتك مع الحجاب.. إمتى؟.. إزاي؟
ياسمينا: اتحجبت في أجازة تانية ثانوي.
ضياء: إحكى القصة.
ياسمينا: مفيش ناس كتير أوي قعدو ينصحوني بالحجاب وخصوصا مدرسة الفرنش وأنا مش كنت بسمع كلامهم الصراحة وكان ييجي رمضان.. البنات اللي مش محجبين في المجموعة يتحجبو كنت بستحقرهم وكان ليا واحدة صاحبتي عندها حالة يوم بالحجاب ويوم من غير عشان كدة مش كنت بسمع لنصيحة حد لأني كنت عاوزة لما اتحجب اتحجب عشان أنا عاوزة حجاب مش أقلعه خالص.
ضياء: طيب وفي البيت عندك.. مش كانو بيقولولك اتحجبي وكدة؟
ياسمينا: يا عم فضلو سنة بحالها يتكلمو وأنا أبتا.. مع نفسويتي.. لا.. عندي في البيت قالولي دى حاجة بينك وبين ربنا ماحدش يقدر يرغمك عليها وقت ماتحسي إنك فعلا عاوزة تتحجبي هنفرح وهيبقا شكلك أحلى وكلام من دة وجربي.. وفي مرة ماكنش في حد في البيت وأنا كنت خارجة قولت أجرب.. وقفت أدام المرايا ولبسته بس اتحرجت أنزل بيه.. قلعته!.. لحد ما جت الأجازة وكنت عند عمو أحمد البقال، فكنت بتكلم معاه وبقوله إني بفكر اتحجب وكدة وقعدنا نتكلم ونهزر كان كلام عادي يعني.. كنت بشتري حاجة منة وماشية.. بس تقريبا هو كان أول حد يعرف إني بفنكر ف الحوار دة.
ضياء: وأنا من هذا البوكس أحب اتوجه بالشكر لعم أحمد البقال.. كملي!
ياسمينا: جيت في مرة روحت عملت شعري ميج وعملت قُصة طايرة.. كنت شبة خالتك نوال الزغبى أوي كل اللي شافوني قالوا كتة $:.. بعد أسبوعين تقريبا.. بابا قالي تعالي نخرج.. قولتلة يللا.. قومت جهزت وقومت قولت لمامتي اطلعي بالطرحة اللي أنا لسة جايبهالك هدية..
ضياء: هههههه.. يخرب بيتك.. بتقلبي مامتك في الهدية اللي جيبهالها.
ياسمينا: أم هند.. مامتي فكرتني بهزر وقالت تاخدني على أد عقلي بقى وكدة وجابيتهالي وقالتلي لو بتلسيها دلوقتي بس عشان الطرحة عجباكي أو مش عارفة تعملي شعرك إيى يبقا مش تلبسيها غير لما تكوني مقتنعة إنك مش هتقلعيها تاني.. بس لبستها وكنت محروجة خالث وكل اللي يشوفني يتنح وفىه بنات رخمة أول ما شافوني واحدة ندهت صاحبتها وقالتلها إيه دة شوفي ياسمينا عاملة إيه.. مش دي اللي كانت من كام يوم صابغة شعرها.. بكرة تقلعه.. بصت لها بقرف ومشيت.. و لاقيتلك تليفونات بفى من أصحابي.. انتي اتحجبتي.. قولتلهم هو دة سرعة انتشار.. كتة من يومها بقى مش قلعت الحجاب خالث.
ضياء: مامتك محجبة طبعا؟
ياسمينا: أيوة.
ضياء: طيب مفيش مرة قلتي هاخلعه؟
ياسمينا: لاء.
ضياء: طيب انتي اتحجبتي في سن صعب تاخدي القرار فيه خصوصا اتعودتي على حاجة معينة.. وعلى شكلك من غيره.
ياسمينا: بس لما خدت القرار أخدتة بمزاجي وأنا عاوزة كدة.. فطالما في اقتناع خلاص يبقا نو بروبروم.
ضياء: أختك الصغيرة محجبة؟
ياسمينا: لما أنا اتحجبت هي قالت إشمعزة أختي واتحجبت هي كمان معايا.. أصل أختي بتقلدني في كل حاجة.. هتيجي على دي وتقف؟!
ضياء: هههههه.. مسكينة اختك.. هتتصدم لما تكبر شوية..
طيب قوليلي.. لو كانو في البيت أجبروكي على الحجاب.. كنتي اتحجبتي؟
ياسمينا: لا طبعا.. أنا اللي في دماغي في دماغي.. ماحدش يقدر يغصبني على حاجة.
ضياء: أو كنتي هتلبسيه ومن وراهم تعملي اللي في دماغك.. صح صح؟
ياسمينا: لا طبعا أدامهم يا باشا.. هههههههههه.
ضياء: يا قلبك!
ياسمينا: آينحم!
ضياء: طيب انتي إن شاء الله لما ربنا يرزقك ببنات يطلّعو عينك كدة.. هتلبسيهم الحجاب إزاي وإمتى؟
ياسمينا: مش هغصبهم على حاجة هسيبهم باقتناعهم علشان يعملوها وهمة راضين على نفسهم وهمة فرحانين من جواهم هسيبهم يعيشو حياتهم بشعرهم عادي.. بس أكيد هتكلم معاهم عن الحجاب من فترة للتانية وكمان مش دايما بأسلوب مباشر ولا إجبار لحد ما همة اللي يفاجئوني بقى.
ضياء: طيب تمام.. عندك حاجة تحبي تضيفيها في المحضر؟
ياسمينا: أنا قولت كل اللي عندي يافندم.
ضياء: خدوها ع الحجز!

هناك 8 تعليقات:

أحمد أحمد صالح يقول...

و مازالت الحوارات - أو التحقيقات - مستمرة !!
و مازلنا متابعون !!
..
تحياتي يا صديقي

Bent Men ElZman Da !! يقول...

لذيذ الحوار ده وياسمينا عسوله فى كلامها كمان
بس انا عجبانى بردو فكره الحوارات دى
ان شاء الله اتابعك دايماً فيها :))

mohamed يقول...

جميله فكرة الحوارات جدا فى موضوع الحجاب يا ضياء وبتبيلنا كثيرا من ثقافات الحجاب فى بلدان كتير
بس عندى طلب يا ضياء , اعتقد انك لو عملت مونتاج للحوارات دى , ممكن تنزل فى كتاب
تحياتى لدوام ابداعك وتألقك

Deyaa Ezzat يقول...

أحمد أحمد صالح

تسلم يا أبو حميد

ألف شكر

Deyaa Ezzat يقول...

Bent Men ElZman Da

مبسوط إن الفكرة عجباكي
إيه رأيك تشاركي ^_^

هكون مبسوط أوي وأكيد هتكون إضافة

نورتيييييييييييني

Deyaa Ezzat يقول...

mohamed

بفكر في كدة فعلا يا محمد بس على حسب السلسلة هتبقى كام حلقة.. كمان مش عايز أزود حلقات في الفاضي.. عايز اتكلم عن تجارب أخواتنا البنات من جميع الدول العربية مع الحجاب .. ولو جاتلي فرصة بتمنى يشارك بنات من معظم دول العالم

ألف شكر يا صديقي

ربنا يكرمك

MEROOooOOoo يقول...

حلو الحوار ده
بس اللى قبله كان أحلى
كمل يا ابن الحلال .. متابعينك

Deyaa Ezzat يقول...

MEROOooOOoo

يارب اللي جي يعجبك

إيه رأيك تشاركينا في السلسلة وتكتبيلنا تجربتك مع الحجاب أو حتى أي مواقف مهمة أو مميزة

فكري؟.. مستني رأيك

ألف شكر على المتابعة

Translate